Bwyd y Fro yn lansio rhaglen goginio a maeth newydd ledled Bro Morgannwg
Mae rhaglen newydd sy'n canolbwyntio ar y gymuned wedi'i sefydlu i helpu pobl ledled Bro Morgannwg i feithrin hyder mewn coginio, maeth a bwyta'n iach trwy gyfleoedd dysgu hygyrch am ddim.
Mae Rhaglen Maeth a Choginio Ymarferol Cymunedol y Fro yn cael ei chyflwyno trwy Bwyd y Fro – partneriaeth bwyd lleol y Fro – mewn cydweithrediad â Deieteg Iechyd y Cyhoedd Bwrdd Iechyd Prifysgol Caerdydd a'r Fro ac fe'i hariennir gan Gronfa Gymunedol y Loteri Genedlaethol.
Mae'r rhaglen wedi'i datblygu i wella mynediad at wybodaeth am fwyd iach, fforddiadwy a diwylliannol briodol, a sgiliau coginio ymarferol ar gyfer unigolion, teuluoedd, a chymunedau ledled y Fro.
Drwy amrywiaeth o weithgareddau croesawgar a chynhwysol, bydd cyfle gan gyfranogwyr i ddatblygu sgiliau, cynyddu hyder, a dysgu sut i wneud dewisiadau bwyd iachach ar gyllideb.
Bydd gweithgareddau'n cael eu cyflwyno mewn lleoliadau cymunedol ledled Bro Morgannwg a byddant wedi'u cynllunio i fod yn hygyrch, yn gynhwysol ac yn ddwyieithog, gan sicrhau bod pobl yn teimlo'n gyfforddus ac wedi'u cefnogi i gymryd rhan.
Bydd cyfleoedd dysgu yn cynnwys:
Sesiynau coginio ymarferol
Gweithdai addysg maeth
Sesiynau galw heibio a sesiynau blasu cymunedol
Digwyddiadau cymunedol dros dro
Cyrsiau Sgiliau Maeth am Oes Achrededig
Cyfleoedd hyfforddi ar gyfer sefydliadau cymunedol, staff a gwirfoddolwyr
Dywedodd Louise Denham, Cydlynydd Bwyd y Fro: “Mae hwn yn gyfle cyffrous iawn i ddod â phobl at ei gilydd trwy fwyd. P'un a yw rhywun eisiau dysgu sgiliau coginio newydd, magu hyder wrth baratoi prydau iach ar gyllideb, neu gysylltu ag eraill yn eu cymuned, bydd rhywbeth i bawb. Rydym yn edrych ymlaen at weithio gyda phobl leol a phartneriaid i wneud y rhaglen hon mor hygyrch, cynhwysol ac effeithiol â phosibl.”
Dywedodd Marie Price, Arweinydd Clinigol tîm Deieteg Iechyd y Cyhoedd: “Rwyf wrth fy modd yn arwain y rhaglen hon yn y Fro, gan ddod â phartneriaid a chymunedau ynghyd i ddarparu cefnogaeth ymarferol ar faeth a choginio, wrth helpu i adeiladu system fwyd leol fwy cysylltiedig a chefnogol.”
Bydd y rhaglen yn cael ei llunio mewn cydweithrediad â chymunedau lleol, sefydliadau partner, a phobl â phrofiad bywyd, gan helpu i sicrhau bod gweithgareddau'n adlewyrchu anghenion a blaenoriaethau lleol.
Ochr yn ochr â hyrwyddo bwyta'n iach, bydd y rhaglen yn annog arferion bwyd cynaliadwy a chyfeillgar i'r blaned, gan gynnwys lleihau gwastraff bwyd, manteisio i'r eithaf ar gynnyrch tymhorol, a chefnogi mentrau bwyd lleol.
Drwy gryfhau gwybodaeth am fwyd, sgiliau ymarferol a chysylltiadau cymunedol, mae'r rhaglen yn cyfrannu at weledigaeth ehangach Bwyd y Fro o greu system fwyd leol decach, iachach a mwy gwydn. Mae hefyd yn cefnogi blaenoriaethau iechyd y cyhoedd ehangach yng Nghymru, gan gynnwys gwaith ataliol, lleihau anghydraddoldebau, meithrin gwydnwch cymunedol, a hyrwyddo systemau bwyd cynaliadwy.
Anogir grwpiau cymunedol, sefydliadau a lleoliadau lleol sydd â diddordeb mewn cynnal sesiynau neu ddysgu mwy am y rhaglen i gysylltu drwy e-bostio nutrition.skillsforlife.cav@wales.nhs.uk